Tónleikar

Yes komst á Sigur rósar tónleika í gærkveldi. Er og var í skýjunum.

Langaði nefnilega svo mikið á tónleikana sem eru á sunnudaginn á Miklatúni/Klambratúni og var næstum orðin bara þunglynd af því að missa af tónleikunum og var svo sannfærð um að þeir mundu ekkert koma á vesturlandið á þessum rúnti sínum.

Var því ægilega hamingjusöm þegar ég fór út í Esso á laugardagskvöldið og það fyrsta sem ég sá var auglýsing um Sigur Rós.

Tónleikarnir voru magnaðir, í einu lagi þá stoppa þeir tónlistaflutninginn (man ekki hvað lagið heitir) og ég var með í maganum yfir því að einhverjir mundu byrja að klappa eða hrópa eitthvað en ekkert slíkt gerðist og áhrifin voru gífurleg - alveg þögn í salnum í pökkuðu félagsheimili.

Tónleikarnir í gær gerðu það enn meira að verkum að mig langar að fara á tónleikana á sunnudaginn!

Þeir voru geðveikir!

Fjör

Það ríkir sko engin lognmolla hér - enda sjaldnast logn á nesinu ;)

En þegar langfjölmennasti dagur í gestakomu á gestastofunni er - hvað gerist þá?

Einhverjar hugmyndir?

Jú jú - klósettin úti, þau eru stífluð eða rótþróin full eða eitthvað álíka því skálarnar eru bara fullar af vatni.

Gaman gaman

Allir með strætó!

Mikið rosalega leiðist mér þessar umræður um strætó núna - sérstaklega náttúrulega þegar ég er með lausnina á þessu öllu saman.

Það náttúrulega sér hver einasti maður það að til þess að laða fólk í almenningssamgöngur þá þurfa þær að vera góðar, skilvirkar og tíðar ferðir. Ef boðið er upp á góðar samgöngur þar sem fólk er fljótt að komast á milli staða, þarf ekki að bíða lengi eftir strætisvagninum eða hvað þá að ganga langa leiðir til þess að taka vagninn að þá ætti þetta að vera fyrir fleira fólk.

Þessi umræða um að hafa frítt í strætó til þess að laða að fleiri eru fáranleg - ég get ekki séð það að ef það er mikið mál og fólk þarf að bíða lengi eftir strætisvagninum að það muni taka hann eitthvað frekar.

Hin leiðin sem væri kannski hægt að fara er sú að fylla allt með einkabílum, gera göturnar troðfullar svo endalausar biðraðir myndist, fólk verði pirrað og hugsi síðan til þess að geti alveg eins tekið strætó og hangið í honum og gert eitthvað "nytsamlegt" meðan það er í umferðasultum.

###

Fékk loksins fólk í óvissuferðina í gær! Jíbbí

Annars hékk ég upp í stiga í fríinu mínu - reyndar bara einn dag af fríinum mínu - þá hékk ég í stiga að mála glugga á 2.hæð í húsinu mínu (aka húsinu þar sem íbúðin mín er). Var svoldið skrýtið að vera þar og geta ekki farið inn í íbúðina sína - en leigjandinn minn er góður og bauð mér að fara inn ef ég þyrfti á klósettið eða fá mér te eða eitthvað, líka grannarnir mínir. Er alveg búin að komast að því að ég á góða granna og sambúðin við þá er bara góð :)

Uppgjör/samantekt

Ég hef ekki enn gert ferðina mína upp - allavega ekki fyrir lesendur ef einhverjir eru ;)

Ég held að ferðin sé eitt af því besta sem ég hef gert og sé ekki eftir því að hafa farið né eftir peningunum sem fóru í hana.

Ég held ég hafi fengið einna mest út úr Ástralíu, gæti spilað inn í að þar var ég lengst en held líka að stórum hluta að þar fór ég líka út úr borgum og upplifði helling af nýjum hlutum. Upplifði náttúrulega líka helling í Kína en "mistökin" mín þar voru að vera í borgum allan tíman og þar var líka fyrsta landið og maður að þreifa sig meira áfram. Í Nýja Sjálandi var þreyta aðeins farin að segja til sín en þar fannst mér ég vera á sífellum þeytingi til þess að ná að sjá það sem ég vildi helst.

Eitt það sem kom mér mest á óvart er hversu auðvelt þetta var allt saman, fannst voða litlar hindranir á leiðinni og allt gekk nánast eins og í sögu. Ég var reyndar líka búin að undirbúa sjálfa mig undir það að verða kannski einhvern tíman einmana, leið eða álíka og það sem kom einna mest á óvart var einmit ég sjálf. Ég fann ekki fyrir neinu af þessum hlutum sem ég bjóst við það er að segja, var aldrei leið né einmana og var sátt og sæl með allt saman. Hafði meira segja á tímabili áhyggjur af því að finna ekki fyrir depurð eða neinu - hélt að ég væri jafnvel bara tilfinningalaus.

En já mig langar aftur út í svona ferð og jafnvel lengur. Langar að fara til Suðaustur Asíu og er samt eiginlega búin að lofa mér til Gutamala á næsta ári að heimsækja Pétur frænda. Væri síðan gaman að ferðast þaðan og niður til Suður Ameríku og taka þá Mið og Suður Ameríku. Ekki væri heldur verra í leiðinni að fara til Boston að heilsa upp á Maríu frænku. Rússland og löndin í nágrenni eru náttúrulega á óskalisti líka en held það geymist aðeins.

Eina eftirsjáin er sú að hafa ekki byrjað á þessu fyrr............

Annars er merkilegt hvað ekkert getur verið fullkomið og eitthvað þarf alltaf að skyggja á!

En allavega næsta ferð er plönuð og búið að borga staðfestingargjald en það er helgarferð til Barcelona.

En eruð þið með einhverjar hugmyndir um hvert ég ætti að fara næst?

Vonsvikin

Í gær var ég að kaupa mér bók um Barcelona á amazon.com í leiðinni ætlaði ég mér að kaupa bækur eftir ástralskan höfund sem mér líkar mjög vel við. Mér til mikilla vonbrigða voru þessar bækur ekki til á lager hjá þeim eða álika.

Ég ákvað síðan að prófa googla höfundinn og fékk heimasíðuna hennar Judy Nunn þar sem var líka vísað á bókabúðir þar sem hægt væri að kaupa bækurnar hennar. Núna er ég að velta fyrir mér hvort ég ætti að kaupa bækur frá bókabúð í Ástralíu - líka þar sem það kostar sitt. Það kostar 20 ozzi dollara fyrir að senda eina bók og svo bættist við 7,5 dollarar við hverja bók sem mér finnst svoldið mikið. Veit ekki hvað ég á að gera :(

En þetta voru mikil vonbrigði að geta ekki keypt frá amazon. Ég var nefnilega búin að leita að þessum höfundi í bókabúð út í New York og svo bara í flugvallabókabúð á Stansted í London.

Annar heimur

Þegar ég kom í bæinn aka höfuðborgina þá fannst mér eins og ég væri að koma í annan heim. Svo allt annar taktur sem slær hér heldur en úti á landi eða minnsta kosti þar sem ég dvelst í sumar. Fann líka í fyrsta skipti fyrir stressinu sem er hér í bænum, var aldrei að fatta almennilega hvað fólk var að tala um þegar var að tala um stressið hérna. Áleit alltaf að það væri eiginlega bara það sjálft sem gat látið stressið hafa áhrif á sig eða ekki.

En rosalega er maður eitthvað fljótur að aðlaga sig - er eiginlega strax búin að venjast borginni aftur :)

Ég var að lesa bókina Long way round þar sem Ewan McGregor og Charles Brooman voru að segja frá ferðalaginu sínum um heiminn á mótorhjólunum sínum. Horfið síðan á þættina sem voru gerðir. Þetta gerði ekkert til þess að slökkva á ferðalönguninni - ýtti heldur undir og svo líka að ferðast á þessar slóðir sem þeir voru á.

En það verður að viðurkennast að ég er farin að sakna íbúðarinnar minnar smá pinku pons!

Frí

Hið langþráða frí er loksins komið eftir um 5 vikna törn. Var svoldið langt!

Og heppnin er með mér því enn og aftur hef ég íbúð og bíl. Ekki amalegt það, held til hjá systur minni, fyrsta kvöldið missti ég mig í stöðvaflakki - hef ekki getað flakkað svona mikið milli sjónvarpsstöðva áður.

Annars er systir mín nú ekki alveg í lagi því hún hringdi í pabba til þess að biðja hann um að fylla bílinn svo ég mundi nú örugglega ekki gera það.

Hef svolitlar áhyggjur af því að geta ekki náð að gera allt það sem ég ætlaði mér en með áframhaldandi rigningu þá verður reyndar ekkert úr málningarvinnu á húsinu mínu þannig að planið um að liggja eitthvað í leti mun ábyggilega takast.

Buhhuu

Ég sit eftir með sárt ennið á gestastofu meðan samstarfsfélagarnir fóru á Fjöruhúsið að fá sér hádegismat!

En þeim er svo sem fyrirgefið því eftir löngu gönguna komu þau með nammi handa mér þannig að núna er komið að mér að kaupa laugardagsnammið.
Allt í föstum skorðum hér á bæ ;)

Leiðrétting

Það var víst ekki alveg rétt hjá mér þegar ég sagði að fyrsta gangan mín hefði verið á sunnudaginn, þetta var í rauninni sú önnur en sú fyrsta sem fólk kom í :) - en núna er ég búin að vera með samtals 4 göngur en aðeins einu sinni fólk komið með mér.
Fer í svo fimmtu á sunnudaginn og vonandi kemur fólk þá.

Er svo farin að telja dagana niður í frí - er orðin þreytt og þrá að vera bara dag þar sem ég geri ekki neitt.

Lúin

Það er ekki laust við að ég sé orðin smá lúin eftir þessa vinnutörn en það eru samt enn um 12 dagar þangað til ég fer í frí - nú þegar búin að vera vinna í um 20 daga.

Fyrsta gangan mín er búin - öll á ensku. Voru mjög áhugasöm um plöntur og vissu mikið meira um þær heldur en ég þannig að fræðslan var í því tilviki eiginlega öfug. Komst síðan að því að maðurinn var líka jarðfræðingur í þokkabót. En þau voru mjög indæl og var mjög fín ganga. Fegnust því að hafa ekki þurft að hafa hana bæði á íslensku og ensku.

Er ein "heima" þessa dagana - það er líka voða ljúft, sé það alveg að með einverunni þá fer ég mikið fyrr upp í rúm heldur en þegar hinir eru. Saknaði þó þess í gær að þegar ég kom heim í gær eftir gestastofuna að það var enginn matur tilbúin og ég þurfti að gera þetta sjálf. Sofnaði líka í sófanum meðan ég var að bíða eftir lasagna inn í ofninum og var næstum búin að brenna það en það kom ekki til þess.

Jónsmessugangan

Jæja fyrri hluta jónsmessugöngunnar lokið. Ég hafði það af, reyndar svoldið illt í löppum í dag og þreytt!

Lukum við gönguna aðeins fyrr en áætlað var þrátt fyrir smá slór og útidúra sem þýðir að ég komst aðeins fyrr upp í rúm eða um þrjúleytið í nótt.

Þurfti síðan að vakna í morgun til þess að koma mér á gestastofuna meðan hinir gátu sofið aðeins lengur.

Annars gat ég ekki munað eftir öllu í morgun og lítur út fyrir að ég hafi gleymt gönguskónum mínum heima - ekki nema ég hafi gert þetta svona ómeðvitað svo ég mundi nú ekki ganga í dag ;) - en mun biðja þau að kippa með sér skónum mínum hingað. Var reyndar líka búin að leggja inn pöntun um nammi sem þau mundu færa mér í dag. Spurning hvort þau muni eftir því.

boy ég er þreytt - væri svo til að liggja bara upp í rúmi.

og

Er mér greinilega mjög ofarlega í huga sambýlið sem ég á við samstarfsfélagana.

Var að hugsa um daginn að núna eiginlega í marga mánuði hef ég alltaf borðað morgunmat - eitthvað sem ég gerði örsjaldan áður fyrr.

Hafði heldur ekkert pælt í því fyrr en núna um daginn að ég borða alltaf morgunmat og í flestum tilfellum með sambýlingum mínum. Við gefum okkur yfirleitt ágætis tíma fyrir morgunmat og svo er smurt nesti eða kannski aðalega þeir sem fara á gestastofuna.

En þetta er afskaplega indælt að borða morgunmat saman - eitthvað sem ég er svo ekki vön.

Ég er samt greinilega skotmarkið hérna - eða hef verið undanfarnadaga. Mér varð það á orði um daginn að það væri aldrei síminn til mín þannig að ég nennti ekki að svara í hann. Nema hvað þá var síminn akkúrat til mín næstu tvö skiptin. Þannig að núna er ég sérstaklega spurð líka hvort megi nota símann hvort ég eigi ekki von á símtali.....

Þegar ég ásakaði líka einn vinnufélagan í morgun að hann væri ábyggilega með einn af húslyklunum sem við vorum að leita að þá kom það skot að þegar ég segði honum að hoppa þá spyr hann hversu hátt -

Eykst íbúafjöldinn í íbúðinni um helgina eða sunnudagin - þá bætast við 2 í 2 nætur þannig að við erum sex í íbúðinni.

Oh well - gott blaður um ekki neitt. Annars veit ég ekki hvernig ég mun fara að - er nefnilega um sjö tíma ganga í kvöld sem byrjar um hálf átta og er til hálf þrjú í kvöld og ég er nú þegar orðin þreytt!

zzzzzz

Sól

Sólin skín hérna á nesinu í dag :) og komst upp í tveggja stafa hitatölu í dag.

Er ekkert smá heppin að ég var ekki föst á gestastofunni - byrjaði á því að ganga Arnarstapa-Hellnar og var svo sniðug að láta hinn landvörðinn (sem ég var að keyra á gestastofuna) taka bílinn yfir á Hellnar.

Fékk svo mútur í dag - eða gæti litið svo á að það hefði verið svo. Þegar ég var að þrífa klósettin á Djúpalónssandi var maður sem kom og færði mér litla áfengisflösku!

Gleymdi síðan alveg að minnast á að það var refaskoðunarferð seinasta sunnudag sem heppnaðist svona rosa vel. Sáum tófuna koma með fugl í kjaftinum til þess að færa yrðlingunum og svo komu yrðlingarnir út að viðra sig og þeim var greinilega nákvæmlega sama um okkur. Þannig að við sátum bara í hrauninu og fylgdumst með yrðlingunum og tófunni.

Bleh

Svo sem ekkert að frétta héðan. Fékk góða hvíld frá gestastofu og gat nýtt tíman í rakstur, gönguferðir, klósettvesen og fleira.

Framundan lítur út fyrir að verði brjálað að gera - jónsmessugangan sem er bæði á föstudags og laugardagskvöldinu. Síðan er afmæli þjóðgarðsins 28. júni, skyndihjálparnámskeið og svo byrja föstu göngurnar í næstu viku.

Sambúðin gengur enn bara fínt - það besta við hana er eldamennskan. Jamm við skiptumst á að elda. Það er svo gott að þurfa ekki sjálfur að hugsa um hvað eigi að elda og þurfa síðan að elda það.

Ég er enn að bíða eftir sumrinu sem virðist ekkert ætla að koma!

Átök

Maður er bara í sífellum átökum við veðurguðina hér.

Í morgun reyndu þeir sitt besta til að koma mér út af veginum þegar ég var að keyra á milli.

Ég hafði betur að þessu sinni!

Sambúð

Sambúðin gengur bara nokkuð vel - og er bara eiginlega nokkuð notalegt að hafa félagsskap svo ég tali nú ekki um að við munum skiptast á að elda sem er þvílíkur munur.

Ég er hinsvegar ekkert hrifin af þessum kulda sem er búin að vera hér - sko ekki par sátt. Í rokinu í gær þá vorum við að reyna eiga við klósettin á Djúpalónssandi, koma þeim aftur í gang. Svo líka þessi skemmtilegheit en það sprakk á jeppanum. Ég er líka þvílíkt fegin að hafa ekki verið ein þá en í sameiningu og með einu simtali til þess að komast að því hvernig hægt væri að fá varadekkið undan bílnum þá tókst að skipta um það og koma á dekkjaverkstæðið.
Þannig að næst þegar springur og ég er ein - jamm ætti að takast ;) - nema ef ég geti ekki losað um rærnar.

Yrði svo týpískt að springi síðan næst á hinum tveimur bílunum ;) bara svo maður geti fattað allt upp á nýtt aftur!

Blaður

Fór suður um daginn í frí.

Megnaði að gera ýmislegt - fór í brúðkaup, innflutningspartý, hitting, saumaklúbb og hádegismat.

Finnst það nokkuð gott afrek!

Mér var hleypt áðan útaf gestastofunni til þess að fara í fuglaskoðunarferð. Var gott að komast út þrátt fyrir rigningu, áttum líka starfsfólkið góða stund að skoða fuglalífið. Fylgdumst þar með einum silfurmávi ræna sér svartsfuglseggi og gæða sér á því og svo öðru.

Sit reyndar núna blaut á gestastofunni - var ákveðið action meðan ég var í burtu í fríi og var aftur núna í morgun. Endalaust drama hérna á nesinu ;)

Er búið að ákveða næstu utanlandsferð - fer í haust! Jíbbíi

Reyndar bara stutt ferð - helgarferð.

Rebbar

Sá tvo rebba í gærmorgun þegar ég var að keyra yfir á gestastofuna.

Annar þeirra var hvítur og ég sá hann hlaupa yfir veginn og hringa sig svo niður, ég stöðvaði bílinn til þess að fylgjast með. Hann hringaði sig niður og ábyggilega alveg sannfærður um það að ég sæi hann ekki. Í eitt augnablik hélt ég líka að þarna væri selur komin og hugsaði hver fjárinn selur væri að gera svona langt upp á landi. Andlitið var eitthvað svo selslegt.
En þegar rebbi litli uppgötvaði það að ég var að fylgjast með honum og sæi hann alveg þá tók hann til fótanna og hvarf upp í móa.

Í morgun var svo Tjaldur einn með hávaða fyrir utan gestastofuna - ég heyrði þennan hávaða og ákvað að athuga málið því þessi fuglahljóð tilheyra ekki myndbandinu sem er sífellt í gangi. Í smástund hélt ég að fuglinn væri inni svo mikil var hávaðinn í honum en þegar ég kíkti út sá ég tjaldinn vera glápa inn um rúðuna. Þetta er sennilegast sami Tjaldur og var víst hérna í fyrrasumar en hann sá spegilmynd sína í glugganum og hefur eflaust verið að reyna að gera sér til við skvísuna sem hann sá þar og skilur eflaust ekkert í því hversu þurrkuntuleg hún er við hann að svara ekki neinu.

En ojá - skítaveður og maður fegin að vera húsvörður í stað landvörður þegar svona er, ef veðrið fer ekki að batna þá hugsa ég haldi bara aftur til Ástralíu!

Ga ga

Ég er meira húsvörður heldur en landvörður þessa dagana.

Búin að sitja á gestastofunni undanfarna daga og mun gera það áfram - að minnsta kosti þangað til aðrir landverðir koma. Er að verða pínku spennt að hitta nýju vinnufélagana.

Annars er alltaf gott að fá staðfestingu á því að maður er ekki ga ga. Málið er að úti á Gufuskálum í landvarðarbústaðinum er baðkar og ég hef farið í bað til þess að reyna hita mér (er ofsalega kalt eitthvað)nema ég get svo svarið fyrir það að vatnið í baðkarinu var gult. Þegar ég lét svo vatn í brúsa til þess að hafa með til drykkjar þá sá ég ekki betur en það var gul slikja á því líka.
Í samtali síðan við yfirmann minn þá sagðí hún akkúrat að leiðslurnar á Gufuskálum væru ryðgaðar þannig að vatnið væri gult en þyrfti að láta renna svoldið tíma.
Þannig að héðan í frá mun ég reyna fylla alla brúsa með vatni frá Hellissandi og hafa í ísskápnum - vatnið þar er mun betra :)

Annars er ég að keppast við að lesa Da Vince Code áður en ég kem í bæinn (aftur) og það verður að segjast að mér finnst þessi bók mun mun mun betri heldur en Englar og Djöful eftir sama höfund. En hér með auglýsi ég eftir einhverjum á myndina þegar ég er í bænum!

Gáta

Af hverju borða ísbirnir ekki mörgæsir?

Hver kannast ekki við þessa gátu og lenda akkúrat í að pæla í því af hverju ísbirnirnir gera það ekki.

Þar sem ég var hinumegin á hnettinum akkúrat á svæðum þar sem mörgæsirnar búa þá ákvað ég að spurja hvort þessi einhver hefði heyrt þessa gátu og lent í gildrunni - neibbs svo var ekki.

Fórum því að tala um mörgæsirnar og þar sem þær hafa víst fundist alla leið í Ecuador og komumst að því að það væri þá kannski ekkert sem segði það að þær færu ekki á norðurpólinn og ísbirnirn ættu þær þar sem engin hefði fundist þar.

Þannig að niðurstaðan er sú að ísbirnir sennilegast éta mörgæsir þar sem þær finnast ekki á norðurpólnum :)