Listi

Gerði lista fyrir nokkru síðan yfir það sem mig langaði að gera í sumar og ætlaði mér að komast yfir. Það er farið að saxast aðeins af listanum :)

En eins og ávallt þá virðist maður ætlar sér mikið meira en er gert enda þýtur tíminn áfram.

Í seinustu viku fór ég á Borgarfjörð Eystra, að keyra þangað var ekki eins rosalegt og þegar ég fór þangað fyrst árið 2004. Þá stóð mér hreinlega ekki á sama en var pollróleg núna. Spurning hvað veldur, bílstjóri með 7 ára meiri reynslu heldur en síðast, bílinn, félagsskapurinn róandi áhrif (sem hann vildi meina), eða að ég var búin að mikla þetta svo fyrir mér og ýkja upp minningarnar frá því seinast.

Borgarfjörður Eystri og umhverfi er fallegt, það urðu þó smá eða mikil vonbrigði með hádegismat. Við borðuðum á Fjarðarborg en þar var bara hægt að fá ruslmat :( - hamborgara eða samlokur. Ætluðum að fá okkur kjötsúpu en var víst ekki til. Umhverfið á veitingastaðnum var heldur ekki upp á marga fiska. Eftir ökuferð út á bryggju þá var ákveðið að kíkja á kaffihúsið Álfasteini í sama bæ og það var kaffihús sem var með sérstöðu. Svona á það að vera, staðurinn var innréttaður mikið til af grjóti. Þar var boðið upp á fiskisúpu og saltfiskbollur ásamt kaffi og kökum.

Einnig skelltum við okkur í Mjóafjörð en þangað hef ég aldrei komið áður og stóð sá fjörður svo sannarlega undir nafni. Keyrðum við einnig alla leið inn að Dalatanga. Fílaði mig svoldið eins og japanskur túristi. Reglulega var bílinn stoppaður og farið út að taka myndir - við ætluðum að styrkja líka heimabyggð með því að borða kvöldmat í Mjóafirði en búið var að loka fyrir slíkt þannig að ekkert var úr því.

Enn á ég samt eftir að fara á steinasafn Petru á Stöðvarfirði og verð ég að fara að vinna í því máli. Sérstaklega þar sem ég var of seint á ferðinni til þess að fara þangað 2004 og aftur í fyrra. Þannig að ég get eiginlega ekki látið það framhjá mér fara núna.